Coas compras de Nadal xa en marcha; o sector comercial, hostaleiro e de servicios de Baio quere unha vez máis agradecer a toda aquela clientela que aposte polo comercio local e de proximidade cun sorteo de máis de 1.000 euros en bonos de compra.
A campaña, impulsada polo Concello de Zas e a agrupación empresarial BaiOn, desenvolverase dende este sábado – 14 de decembro – ata o 5 de xaneiro. Nela participan case 70 establecementos da vila que contan nas súas portas e escaparates cun distintivo en forma de piruletas.
Todas as compras e consumicións realizadas neles terán opción a un dos bonos de compra que se sortearán unha vez rematada a campaña comercial.
1ª Feira de Artesanía de Nadal
Ao mesmo tempo que arranca a campaña de Nadal, tamén comeza a 1ª Feira de Artesanía de Nadal que terá lugar durante esta fin de semana (sábado e domingo) en Baio e na que o Concello de Zas e o grupo empresarial BaiOn teñen preparadas unha gran cantidade de actividades para todos os públicos que se desenvolverán na carpa situada na Praza Jorge Mira Pérez.
Ademáis as compras realizadas durante esta fin de semana nos establecementos adheridos terán dobre premio; xa que entratarán no sorteo dos 1.000€ e tamén recibirán un vale para canxear por chocolate quente que se servirá na Praza Jorge Mira Pérez por cortesía de Feirauto.
Programación de Nadal
O Concello de Zas vén de presentar a súa programación de Nadal na que, como vén sendo habitual, se inclúen diferentes actividades que se realizarán na carpa instalada na Praza Jorge Mira. Entre estas están a visita de Papá Noel, as festas de pre Fin de Ano (unha infantil e outra para persoas adultas) e a cabalgata de Reis.
