Máis de cen nenos e nenas de todo o municipio participaron nos campamentos urbanos deste verán

08/31/2022

 

Pouco a pouco o verán vai chegando ao seu fin e con el remata tamén a programación cultural posta en marcha polo Concello de Zas durante os meses de xullo e agosto. Foron dous meses moi intensos cunha gran oferta de actividades para toda a familia. Pero sen dúbida unha das de maior éxito foron os campamentos urbanos que se realizaron nas Torres do Allo e cos que o goberno municipal pretende facilitar a conciliación familiar e laboral da nosa veciñanza.

En total participaron máis de cen nenos e nenas tanto do noso concello como doutros limítrofes. Realizáronse catro quendas de dez días naturais e, aínda que en cada unha delas se trataron temáticas diferentes, todas incluíron actividades de xénero, medioambientais e cívicas. Os campamentos, que se realizaron en horario de mañá, estiveron guiados polos monitores e monitoras da empresa Divir-TT.

Gran festa

Os campamentos despedíronse onte ata o próximo ano cunha gran festa celebrada nos exteriores do pazo das Torres do Allo e á que asistiron unha boa parte dos nenos e nenas que participaron nas diferentes quendas. Houbo de todo: inchables, festa da escuma e unha gran sesión musical co DJ Rokiño. 

Ata alí achegouse tamén o Alcalde de Zas, Manuel Muíño, quen puido comprobar de primeira man o éxito dos campamentos xa que tanto os pais/nais alí presentes coma os nenos e nenas que participaron na actividades contáronlle o ben que o pasaran nos campamentos. Muíño aproveitou a ocasión para desexarlle a todas e a todos unha feliz volta ao cole.