No segundo reconto da campaña anual de trampeo da vespa velutina impulsada polo Concello de Zas contabilizáronse un total de 1.621 raíñas de vespa velutina que, sumadas ás 1.209 do primeiro reconto, fan un total de 2.830 capturas.
Na campaña, que se estenderá ata finais deste mes e que está xestionada pola empresa Plaguiber, colaboran 132 veciños e veciñas das diferentes parroquias que forman o noso municipio e aos que no pasado mes de marzo se lles entregou as trampas xuntos co seu correspondente líquido atraínte. Grazas á colaboración da veciñanza instaláronse xa 235 trampas ás que hai que sumarlle outras 80 trampas que están colocadas en diferentes lugares públicos e altamente sensibles a esta praga como os paseos fluvias, os xardíns das Torres do Allo, as zonas próximas aos centros de saúde e dos centros educativos,…
Aínda que este é un problema que afecta a toda Galicia, este é o quinto ano que o Concello de Zas destina unha parte dos seus recursos económicos a loitar contra a praga da vespa velutina. Ao igual que nos anos anteriores, a campaña de trampeo púxose en marcha no momento no que as raíñas comezan a despertar do seu letargo invernal e que comezan a facer os primeiros niños. Tal e como explican dende Plaguiber, “a captura de 2.830 raíñas evita a formación doutros tantos niños”.
Todas aquelas persoas que localicen un niño primario deben de comunicalo no número de teléfono 012 da Xunta de Galicia para a súa retirada.