A mostra sobre o legado de Enrique Labarta Pose que está instalada de forma permanente no Centro Sociocultural de Baio dende o pasado verán vén de sumar novos exemplares doados recentemente por Ramón Romar, natural de Fornelos.
Trátase de seis obras escritas por Enrique Labarta Pose e que Ramón Romar cede co fin de que o Concello de Zas se encargue da súa divulgación, exposición e estudo. Os traballos quedarán expostos na mostra xunto co resto do legado do escritor baiés que gardou durante anos José Rojo Valiña e que o pasado verán as súas irmáns cederon ao Concello de Zas.
Acompañado polo Alcalde de Zas, Manuel Muíño, e pola súa familia, Ramón Romar visitou o pasado sábado a mostra permanente sobre o legado de Enrique Labarta Pose e a exposición itinerante da vida e obra do escritor que nestes momentos tamén se atopa no Centro Sociocultural de Baio. Romar aproveitou a visita para entregar dúas copias dos seus dous libros “Ancestro y Vivencias” e “Ancestros y Vivencias II” que estarán ao acceso de toda a veciñanza na biblioteca do Centro Sociocultural de Baio e nas Torres do Allo.
Relación de obras de Enrique Labarta Pose cedidas por Ramón Romar:
- “Contos”. Editorial Galaxia
- “Enrique Labarta Pose. Obra Completa”. Biblioteca de Autores Gallegos. Editorial Edinosa
- “Poesías en gallego y castellano”. Co prólogo de Benito Varela Jácome
- “Cuentos humorísticos”. Co prólogo de Benito Varela Jácome
- “O Tío Miseria”
- “Adormideras. Poesía festivas”