Entroido xa case está aquí e no Concello de Zas xa temos todo preparado para recibir unha das festas máis agardadas do ano. Coma sempre, haberá actividades nas que pode participar toda a veciñanza. Debullámolas todas a continuación:
FESTA DE ENTROIDO
Esta programación especial arranca o sábado 1 de marzo cunha gran festa de Entroido que celebraremos no polideportivo municipal de Baio a partir das 17:00 horas. Haberá inchables, maquillaxe, xogos e un concerto-punk para os máis pequenos amenizado por Brais das Hortas e Peter Punk. Tamén haberá doces típicos de entroido e cantina a favor do alumnado de 4º da ESO do IES de Baio.
OBRADOIROS DE ENTROIDO INFANTÍS
Como de costume nas vacacións escolares, o Concello de Zas oferta uns obradoiros para a rapazada co fin de facilitar a conciliación laboral e familiar da veciñanza. Os talleres serán os días 3 e 4 de marzo e realizaranse dúas quendas; unha no Centro Sociocultural de Zas e outra no Centro Sociocultural de Baio. As dúas serán en horario de 10:00 a 13:00 horas e para participar é necesario anotarse previamente no 981 751 398 ou no 981 718 056. Son de balde.
CONCURSO DE DISFRACES
O martes de entroido, 4 de marzo, faremos o noso tradicional concurso de disfraces no polideportivo municipal de Zas que estará acompañado dunha gran festa que comezará ás 16:00 horas e na que haberá inchables, pintacaras, animación musical con Pequedisco Moc Moc e filloas á pedra para todos e todas. Tamén haberá máis doces tradicionais do Entroido e cantina a favor do alumnado de 4º da ESO do CPI de Zas.
A iso das 19:00 horas comezará o concurso de disfraces no que se poderá participar tanto de forma individual como en grupos. Repartiranse 1.750€ en premios que se distribuirán da seguinte maneira:
Categoría A (de 0 a 5 anos)
• 1º premio: 150€
• 2º premio: 75€
• 3º premio: 50€
Categoría B (de 6 a 14 anos)
• 1º premio: 150€
• 2º premio: 75€
• 3º premio: 50€
Categoría C (máis de 15 anos)
• 1º premio: 250€
• 2º premio: 150€
• 3º premio: 100€
Grupos (máis de 3 compoñentes)
• 1º premio: 300€
• 2º premio: 200€
• 3º premio: 100€
Tamén haberá o premio especial “Zaschoqueiro” de 100€ ao disfraz máis orixinal e peculiar ataviado de xeito artesanal e estrafalario.
Para participar no concurso de disfraces é necesario anotarse previamente nas dependencia do Concello ou ben o propio día do concurso antes das 18:00 horas no propio polideportivo. A bases do concurso tamén se poden consultar na Sede Electrónica do Concello de Zas.